Некои од погодените области се речиси недостапни, што го отежнува проценувањето на штетите и бројот на жртвите
Земјотресот што вчера силно ги потресе јужна Турција и соседна Сирија погоди области со милиони бегалци кои веќе се во безизлезна ситуација.
„Не го знаеме точниот број на бегалци погодени од последната катастрофа и можеби ќе поминат уште неколку дена пред да се знае колкав е бројот, но стравуваме дека бројката е огромна со оглед на тоа што епицентарот на земјотресот е блиску до зона со висока концентрација на бегалци“,
предупреди Агенцијата за бегалци на ОН (УНХЦР).
Некои од погодените области се речиси недостапни, што го отежнува проценувањето на штетите и бројот на жртвите. Турција е прибежиште за повеќе од 3,5 милиони сириски бегалци, од кои половината се деца. Од 15 милиони жители на десетте турски провинции погодени од вчерашниот земјотрес со јачина од 7,8 степени според Рихтер, 1,7 милиони од нив се сириски бегалци.
„Тие десет провинции имаат најголемо бегалско население во светот“,
рече Филип Леклер, претставник на УНХЦР во Турција.
Пред земјотресот, околу 6,8 милиони луѓе беа раселени во Сирија. На северот има и околу 60 000 палестински бегалци.
Во таа земја се наоѓаат 12 палестински бегалски кампови со околу 438 000 луѓе. Три се наоѓаат во северниот регион на Сирија погоден од земјотресот – Латакија, Неираб и Ајн Ел Тал. Таму се сместени 57 000 Палестинци, изјави Тамара Алрифаи, портпаролка на агенцијата на ОН за палестински бегалци (УНРВА).
Агенцијата упати апел да се соберат 2,7 милиони долари за помош на тие бегалци.
Извор: 360stepeni.mk
