ГАЗА (АА) – Израелската војска денес го прошири својот упад во Рафа во најјужниот дел на Појасот Газа и напредуваше кон источните подрачја на бегалските кампови Ал-Бурејџ и Ал-Магази, во централниот дел на Појасот Газа, јавува Анадолу.
На дописникот на Агенција Анадолу очевидци му го потврдија напредувањето на израелските воени возила кон подрачјето „Источна гаража“ и во близина на џамијата Ал-Авда во центарот на Рафа.
Тие додадоа дека напредувањето на израелската војска доаѓа при силно израелско артилериско гранатирање на Рафа.
Репортерот на Анадолу наведе дека во Кан Јунис израелската војска извршила упад во градот Ал-Карара, на истокот на Кан Јунис.
Во централниот дел на Појасот Газа израелската војска изврши ограничен упад кон источните подрачја на бегалските кампови Ал-Бурејџ и Ал-Магази под силно артилериско гранатирање на тоа подрачје, при што загинаа многу Палестинци.
Министерството за здравство допрва треба да го потврди бројот на настрадани во таа област.
Израел ја продолжува својата брутална офанзива против Појасот Газа и покрај Резолуцијата на Советот за безбедност на Обединетите нации со која се бара итен прекин на огнот.
Според локалните здравствени власти, во Газа се убиени над 36.500 Палестинци, огромно мнозинство жени и деца, а речиси 83.000 се повредени.
Израел е обвинет за геноцид пред Меѓународниот суд на правдата (МСП), кој во својата последна пресуда му нареди на Тел Авив веднаш да ја прекине операцијата во Рафа, каде што повеќе од еден милион Палестинци побараа засолниште од војната.
Извор: Anadolu Agency (AA)
