АНКАРА (АА) – Палестинската група на отпорот Хамас во петокот соопшти дека позитивно гледа на говорот на американскиот претседател Џо Бајден во врска со новиот предлог за прекин на огнот, кој според нив бил одобрен од Тел Авив, известува Анадолу.
Хамас објави дека го поздравува повикот за траен прекин на огнот, повлекувањето на израелските сили од Појасот Газа, обновата на Газа и размената на заробеници.
„Ставот на САД и она што е утврдено на регионалната и меѓународната сцена со убедувањето за неопходноста од завршување на војната во Газа се резултат на легендарната непоколебливост на нашиот народ и неговиот храбар отпор“ се вели во соопштението.
Хамас ја повтори подготвеноста да се вклучи позитивно и конструктивно во секој предлог заснован на траен прекин на огнот и целосно повлекување на израелските сили од Појасот Газа, обнова на Газа и враќање на раселените во нивните домови.
Се истакнува подготвеноста кон исполнувањето на вистинскиот договор за размена на затвореници доколку окупациските сили јасно ја објават својата посветеност кон таковиот договор“.
Предлогот што го објави Бајден содржи три фази, од кои првата трае шест недели и вклучува целосен прекин на огнот, повлекување на израелските сили од населените области во Газа и размена на заробеници.
Повеќе од 36.200 Палестинци се убиени, а 82.000 се ранети во израелските напади на Појасот Газа од 7. октомври досега.
Израел е обвинет за геноцид пред Меѓународниот суд на правдата (МСП), кој во својата најнова одлука му нареди на Тел Авив веднаш да ја прекине операцијата во Рафа, град во јужниот дел на Појасот Газа, каде што повеќе од милион раселени Палестинци побараа засолниште.
И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.
Извор: Anadolu Agency (AA)
