МАДРИД (АА) – Премиерот на Шпанија, Педро Санчез, ова утро изјави дека во текот на денот шпанската Влада ќе одобри мерка за официјално признавање на палестинската државност, известува Анадолу.
„Ова е историска одлука што има една цел – да придонесе за постигнување мир меѓу Израел и Палестина“, рече премиерот Санчез за време на своето обраќање во Мадрид.
Санчез истакна дека Шпанија ќе ја признае палестинската држава врз основа на границите од 1967 година, признавајќи ги само промените за кои се согласија и двете страни.
„Иако не е на Шпанија да ги дефинира границите на другите нации, нашиот став е усогласен со резолуциите на Советот за безбедност на Обединетите нации и со позицијата што традиционално ја зазема Европската Унија“, нагласи шпанскиот лидер.
Санчез додаде дека палестинската држава треба да биде „одржлива“ со Западниот Брег и Газа кои се поврзани со коридор и Источен Ал-Кудс (Ерусалим) како главен град.
„Денешната одлука е заснована врз меѓународното право и почитување на поредокот заснован врз правила – принципи што нѐ водат без оглед на контекстот“, рече Санчез.
Шпанскиот премиер додаде дека од среда неговиот фокус ќе биде на залагањето за одржливо решение со две држави, со цел да се донесе траен мир во регионот.
Норвешка и Ирска, исто така, денес официјално ќе ја признаат палестинската државност.
Извор: Anadolu Agency (AA)
