ГАЗА (АА) – МУХАМЕД МАЏИД –
Палестинските мајки кои останаа без своите деца во војната во Појасот Газа, кој со месеци е под интензивни израелски напади, се обидуваат да го продолжат својот живот и покрај длабоката болка, пишува Анадолу.
Во израелските напади врз Појасот Газа од 7 октомври загинаа 34.904 Палестинци, меѓу кои најмалку 14.944 деца и 9.849 жени, а повредени се 78.514 Палестинци.
Илјадници мајки останаа без децата, а многу деца исто така останаа без мајки и татковци.
Мајките, кои побегнаа во градот Рафа, каде што живеат во шатори, Денот на мајката, 12 Мај, го дочекуваат во длабока болка и тага.
Денот на мајката е празник кој во повеќето делови на светот се одбележува на 12 мај.
Палестинските мајки живеат со надеж дека што поскоро ќе се вратат во своите домови и ќе го продолжат животот како пред војната.
– Геноцид во Газа –
Хена ебу-Чебел (55), мајка на осум деца, за Анадолу изјави дека изгубила едно дете во израелските напади и дека и покрај болката, се обидуваат да го продолжат животот.
„Живееме во шатори во многу тешки услови. Немаме вода, немаме храна, немаме облека. Се соочуваме со опасност од геноцид”, рече оваа Палестинка.
Таа истакна дека се соочуваат со многу потешкотии.
„Го изгубив и синот. Кога мајка ќе остане без своето дете тоа е како да останала без душата“, рече оваа мајка и ги повика сите мајки на светот да го поддржат палестинскиот народ.
– Ужасите на војната –
Меха Хашан, друга палестинска мајка, рече дека нејзиниот 9-годишен син е убиен во израелските напади, а нејзината ќерка е тешко повредена во бомбардирањето на нивната куќа.
Таа истакна дека ѝ било многу тешко откако го изгубила синот, но дека се соочуваат и со други проблеми, како недостиг од вода и храна.
„Оваа војна конечно мора да престане, сакаме земјите во светот да обезбедат хуманитарната помош да влезе во Газа“, рече таа.
– Децата како жртви –
Неџа ел-Акад (70), која има три внуци, раскажа дека се селеле од место до место и на крајот завршиле во шаторската населба.
„Го изгубив синот во израелски напад, од кој ми останаа три внучиња“, рече Ел-Акад и додаде дека со внуците се борат да преживеат, а тешко наоѓаат и вода, лекови и храна.
– Проблеми со водата за пиење –
Палестинката Дања Мухамед (55) раскажа дека морале да го напуштат својот дом на почетокот на војната и сега живеат под шатор во Рафа.
„Овде сега сме под закана од напади на израелските авиони“, раскажа оваа Палестинка, истакнувајќи дека се обидуваат да преживеат во многу тешки услови.
„Имаме проблеми да најдеме вода за пиење и се соочуваме со голема сиромаштија“, изјави оваа мајка, изразувајќи надеж дека нападите ќе завршат и дека конечно ќе живеат во мир и безбедност.
„И ние сакаме да живееме безбедно како жените во другите делови на светот“, е нејзината единствена желба и ги повика сите мајки на светот да бидат со нив и да ги поддржат.
Извор: Anadolu Agency (AA)
