Турската опозиција оствари голема победа на локалните избори загрижувајќи го претседателот Реџеп Таип Ердоган. Актуелниот градоначалник на Истанбул, Екрем Имамоглу, од Републиканската народна партија однесе победа, а на власт остана и Мансур Јавас, градоначалникот на Анкара. Севкупно, опозициската Републиканска народна партија ги освои општините во 36 од 81 провинција во Турција, навлегувајќи во многу упоришта на АКП, односно Партијата на развојот на Ердоган. Таа освои 37 отсто од гласовите на национално ниво, во споредба со 36 отсто за АКП. Ова е најголема изборна победа на Републиканците откако Ердоган дојде на власт пред две децении. Тој пак, го призна поразот велејќи дека неговата партија претрпела губење на растот низ цела Турција.
„Ќе ја почитуваме одлуката на нашата нација. За жал, девет месеци по нашата победа на изборите на 28 мај, не можевме да го добиеме резултатот што го посакувавме на локалните избори. Ќе ги исправиме нашите грешки и недостатоци“, рече Ердоган.
Лидерот на турската опозиција, Екрем Имамоглу рече дека гласачите воспоставиле нов политички поредок во државата, а првиот човек на Републиканската народна партија, оцени дека гласачите одлучиле да ја сменат 22-годишната слика во Турција. Главното бојно поле беше Истанбул, град со 16 милиони жители.
„Почитувани граѓани, ја отворивте вратата за нова иднина. Турција ќе биде поинаква Турција. Дадовте можност да го направите првиот чекор кон Турција каде ќе цветаат демократијата, слободата, еднаквоста, рационалноста, науката, љубовта и солидарноста“, рече Имамоглу.
Околу 61 милион граѓани имаа право на глас, а повеќе од еден милион за првпат гласаа. Одзивот беше околу 76 отсто, наспроти 87 на изборите лани.
Извор: alsat.mk
