ТОРОНТО (АА) – Шефот за надворешна политика на Европската Унија, Жозеп Борел, рече дека Израел е одговорен за хуманитарната криза во Појасот Газа со попречување на испораката на помошта, јавува Анадолу.
„Мораме да ја зголемиме хуманитарната помош (во Газа). Но имајте на ум дека оваа хуманитарна криза не е предизвикана од природна катастрофа. Тоа не е поплава, не е земјотрес. Тоа е хуманитарна катастрофа предизвикана од човекот“, изјави Борел за новинарите во Обединетите нации, додавајќи дека ЕУ ја зголемува својата хуманитарна помош.
„Мораме да ја мобилизираме меѓународната заедница, но најитно е израелските власти да престанат да го попречуваат влезот на хуманитарната помош“, додаде тој.
Борел истакна дека израелското попречување на хуманитарната помош за Газа е главниот проблем, велејќи дека доставувањето помош по воздушен или морски пат не може да биде алтернатива на копнените патишта.
„Не можеме да замениме стотици тони и стотици камиони кои доаѓаат по копнен пат со воздушна операција“, рече тој.
Во врска со неодамнешната изјава на папата Франциск за Украина да го подигне „белото знаме“ и да преговара за завршување на војната со Русија, Борел рече: „Мислам дека не постои начин Украинците да се предадат, да го подигнат белото знаме. Не е дојден тој момент за Украинците. Тие треба да продолжат да се спротивставуваат на напаѓачот, а ние мора да продолжиме да ги поддржуваме во отпорот.“
Борел нагласи дека ЕУ не е против Русија или рускиот народ.
„Ние сме само против авторитарниот режим кој го нападна својот сосед, прекршувајќи ја Повелбата на Обединетите нации“, рече тој.
Извор: Anadolu Agency (AA)
