Американската академија за филмски уметности и науки доцна вечерва во Долби Хол во Лос Анџелес ќе ја одржи 96-тата церемонија на доделување на престижната награда Оскар, а фаворит е филмот „Опенхајмер“ со 13 номинации.
„Опенхајмер“ веќе има освоено неколку значајни награди Златен глобус, американски филмски и телевизиски награди, неколку награди од Британската академија за филмска и телевизиска уметност (БАФТА), награда од Здружението на режисери на Америка (ДГА) и главната награда од Здружението на продуценти (Producers Guild of America – PGA).
Филмот „Кутри суштества“ на Јоргос Лантимос за женската верзија на Франкенштајн во викторијанската ера доби 11 номинации, додека филмот „Убијци на цветната месечина“ на познатиот Мартин Скорсезе за убиствата на Индијанците во американската држава Оклахома на почетокот на 20 век, доби 10 номинации.
Адаптацијата „Барби“ на Грета Гервиг доби осум номинации, соопшти Академијата, чии номинации беа објавени на 23 јануари.
Домаќин на церемонијата ќе биде комичарот Џими Кимел, кој веќе неколку пати го водеше доделувањето.
Извор: 24vesti.mk
