Експлозија на бомба среде пат одзеде два животи во Пакистан, повредено едно лице

КАРАЧИ (АА) – Двајца осомничени милитанти загинаа додека превезувале експлозивен материјал на својот мотоцилк ова утро во северозападен Пакистан, соопшти полицијата, додавајќи дека во инцидентот е повреден и еден случаен минувач, пренесува Анадолу.

Несреќата се случи на главната сообраќајница во Пешавар, главниот град на северозападната провинција Хајбер-Пахтунва, која се граничи со соседен Авганистан.

Шефот на полицијата на Пешавар, Кашиф Абаси, за новинарите изјави дека двајца осомничени милитанти превезувале експлозивен материјал од една локација на друга, кога се лизнал мотоциклот со кој се возеле.

„Во експлозијата загинаа и двајцата милитанти, а случајниот минувач е тешко повреден. Потврдено е дека не се работи за самоубиствен напад“, изјави Абаси.

Локалниот емитер Geo News објави снимка на која се гледа јагленисан мотоцикл среде пат, додека полицијата ја оградува локацијата.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.