Зеленски со месеци има проблем со составување на политички консензус околу стратегијата за мобилизација, што пак на терен се одразува со хаос, некогаш и буквално бркање на потенцијални регрути по украинските улици.
„Дел од мажите на возраст за регрутирање почнаа да се кријат загрижени дека ќе бидат регрутирани во лошо опремена армија и испратени во сигурна смрт имајќи предвид дека помошта за Украина останува заглавена во Вашингтон,“ пишува Вашингтон пост.
Токму немањето на „јасна стратегија за мобилизирање“ беше еден од факторите кој придонесе за отпуштање на генералот Валериј Залужниј и негова замена со Олександар Сириски.
Новиот водач на украинската армија започна ревизија на вооружените сили за да најде свежи регрути откако кабинетот на Зеленски обвини дека од 1 милион луѓе кои се мобилизирани, само 300.000 биле на фронтот. Еден месец по назначувањето на Сириски, се уште нема објаснување каде се овие 700.000 или што прават.
Украинската опозиција критикува дека е неопходна заедничка порака од претседателот и војската, за да се избегне дополнителна забуна меѓу народот.
„Не знам зошто Зеленски или неговиот тим се уште се обидуваат да го убедат народот дека сè секогаш е во ред. Не е, посебно не кај армијата,“ изјавила пратеничката Соломиа Бобровска.
Бројот на војници со кои располага Украина сега се претвори во стратешка криза, која делумно е одговорна за украинското повлекување од Авдивка и околината.
Советникот за регрутирање на министерството за одбрана, Олексиј Бежеветс, порачува дека цивилите кои се на возраст за служење војска мора да прифатат „дека нема веќе време за седење дома“.
„Сосема е можно дека Русите наскоро ќе се приближат многу поблизу ако нема кој да ги запре.
Ако згора на недостатокот на муниција, оружје, гранати итн. имаме и недостаток на војници, тогаш тоа е трагедија,“ порачал Бежеветс.
До сега регрутацијата важеше за мажите постари од 27 години, додека оние од 18 до 27 можеа сами да се пријават за служење. Во украинскиот парламент со месеци се дебатира околу промени во законот за мобилизација со кои границата се симнува на 25 години.
Отпорот кон оваа промена во парламентот е дека за некои пратеници таа е обид на Зеленски да ја префрли на парламентот одговорноста за носење на неизбежно непопуларната одлука.
Законот е одбиен и затоа што не предвидува начин за демобилизација на војниците кои веќе истерале неколку долги тури на фронтот, заради што излегува дека „единствен начин да се вратиш дома е повреден или мртов.“ Други пратеници имаат проблем со мерки како суспендирање на возачка дозвола и запленување на банкарски сметки за сите мажи кои нема да се регистрираат. Стравувајќи од вакви мерки во јануари годинава беа повлечени 700 милиони долари од украинските банки.
„Приоритет треба да бидат гаранциите дека луѓето кои се мобилизирани нема да бидат испратени на фронт без обука и без соодветна опрема. Тоа навистина ги плаши луѓето и создава недоверба во властите,“ изјавил опозицискиот пратеник Володимир Арјев.
ИЗВОР: off.net.mk
