АНКАРА (АА) – Израелскиот напад на недолжните цивили што чекаа во ред за помош е доказ дека цел е свесно и колективно уништување на палестинскиот народ, порачаа вчера од Министерството за надворешни работи на Туркије, известува Анадолу.
Министерството со соопштение се огласи во врска со израелскиот напад врз Газа, во кој смртно настрадаа најмалку 112 Палестинци кои чекаа хуманитарна помош.
„Со убивањето на Палестинците на плоштадот Набулси, Израел на своите злосторства против човештвото додаде уште едно злосторство. Фактот дека Израел, кој жителите на Газа ги осуди на изгладнување, овој пат како цел ги имаше недолжните цивили што чекаа во ред за помош, што е доказ дека има цел свесно и колективно уништување на палестинскиот народ“, се истакнува во соопштението.
Анкара нагласи дека Израел мора веднаш да ја прекине воената операција во Газа, но посочи дека израелската Влада нема здрав разум и совест за да донесе таква одлука.
„Целиот свет мора да види дека угнетувањето во Газа ќе се претвори во катастрофа што ќе има глобални последици надвор од регионот. Во тој контекст, ги повикуваме сите групи што имаат влијание врз израелската Влада да ја запрат бруталноста во Газа“, пишува во соопштението на турското МНР.
Министерството за здравство во Газа објави дека најмалку 112 лица се убиени, а 760 се ранети вчера наутро кога израелските сили изведоа напад врз Палестинците кои чекаа хуманитарна помош јужно од градот Газа.
Израелската војска објави дека прелиминарната истрага открила дека некои Палестинци му се приближиле на воениот контролен пункт, а војниците пукале истрели на предупредување и пукале во нозете на Палестинците кои продолжиле да се движат кон израелските трупи.
Од почетокот на израелските немилосрдни воздушни и копнени напади врз Појасот Газа со неселективно бомбардирање на цивилни населби, училишта, верски објекти и болници по неочекуваниот напад од страна на Хамас на 7 октомври минатата година, досега се убиени над 30.000 Палестинци, главно деца и жени, а ранети се повеќе од 70.000 лица, објавија здравствените власти на палестинската енклава.
Се претпоставува дека под урнатините се наоѓаат илјадници мртви.
По тужбата за геноцид што ја поднесе Јужноафриканската Република, Меѓународниот суд на правдата на 26 јануари пресуди дека Израел мора да се воздржи од какви било активности поврзани со убивање, напади и уништување на жителите на Газа и да ги преземе сите мерки за да спречи геноцид.
Меѓутоа, израелските сили и понатаму продолжуваат со нападите врз Појасот Газа.
Официјалната бројка на загинати во Израел изнесува 1.200, но, според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.
„Ханибалова директива“ или „Ханибалов протокол“ е контроверзна процедура што ја користат израелските одбранбени сили (ИДФ), со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“. Овој протокол од страна на Израел е воведен во 1986 година.
Извор: Anadolu Agency (AA)
