КИЕВ (АА) – Претседателката на Европската комисија, Урсула фон дер Лајен, денес го посети Киев, главниот град на Украина, одбележувајќи ја втората годишнина на војната меѓу Киев и Москва, известува Анадолу.
„Повеќе од кога било, цврсто стоиме покрај Украина. Финансиски, економски, воено, морално, додека земјата конечно не биде слободна“, рече претседателката на Европската комисија, Урсула фон дер Лајен.
За време на посетата, Фон дер Лајен на украинската полиција ѝ предаде 50 нови возила што ги финансираше Европската унија.
„Возилата ќе им помогнат во секојдневната работа. Да донесат безбедност и стабилност на териториите што ги ослободија храбрите украински вооружени сили, и да го поддржат населението. Тоа е солидарноста на ЕУ на дело“, рече претседателката на Европската комисија.
Денес се навршија две години од почетокот на војната што Русија ја започна во Украина, како и 10 години од илегалната анексија на украинскиот полуостров Крим и градот Севастопол.
Високорангирани функционери на ЕУ вчера изразија „силна и непоколеблива“ поддршка на европскиот блок на Киев во борбата против Русија.
Во заедничката изјава, претседателот на Европскиот совет, Шарл Мишел, фон дер Лајен и претседателката на Европскиот парламент, Роберта Метсола, ја одбележаа „трагичната годишнина“.
Вниманието го привлече фактот дека изјава не дадоа во име на Европската унија туку како лидери на три институции на ЕУ. Подоцна се дозна дека поради противење на Унгарија изјавата не можела да биде дадена со согласност на сите земји-членки.
Извор: Anadolu Agency (AA)
