Американскиот Сенат усвои пакет помош од 95,3 милијарди долари за Украина, Израел и Тајван

ИСТАНБУЛ (АА) – Американскиот Сенат денес го одобри планот за помош од 95,34 милијарди долари за Украина, Израел и Тајван, јавува Анадолу.

Сенатот ја усвои мерката со 70 гласови спрема 29, надминувајќи го потребниот праг од 60 гласови потребен во последните години за одобрување, но одобрувањето од Претставничкиот дом е далеку од сигурно.

Дваесет и двајца републиканци застанаа на страната на мнозинството демократи во одобрувањето на законот.

Мерката вклучува 60 милијарди долари финансирање за Украина, со уште 14 милијарди долари за поддршка на Израел и американските воени операции во регионот и повеќе од 8 милијарди долари за поддршка на американските партнери во Индо-Пацифичкиот Регион, вклучувајќи го и Тајван.

Исто така, ќе се одвојат речиси 10 милијарди долари за хуманитарните напори во Украина, Израел и Газа.

Мерката се соочува со неизвесна судбина во Претставничкиот дом, кој исто така мора да ја усвои за да стане закон, заедно со потписот на претседателот Џо Бајден.

Претходно републиканците бараа помошта за Украина да биде поврзана со засилени безбедносни мерки на границата меѓу САД и Мексико, но потоа го сменија својот став.

Републиканците во Претставничкиот дом станаа погласно скептични за испраќањето поголема помош за Украина, иако сојузниците на САД во Европа предупредуваат дека без таква помош Русија е на пат да победи.

Помошта за Израел, исто така, наиде на критики од истакнати пратеници, како што е сенаторот Берни Сандерс, кој прашува зошто САД треба да испратат повеќе пари на израелската Влада која се обидува да го блокира решението за две држави и уби над 28.000 Палестинци во Газа од октомври минатата година, а исто така и се суди во Хаг за геноцид.

Коментирајќи го усвојувањето на законот во Сенатот, украинскиот претседател Владимир Зеленски рече дека одлуката ја чекаат не само Украина, туку и многу други земји, особено во Европа.

„Светот чека американското раководство да остане непоколебливо и да помогне во заштитата на животите и зачувувањето на слободата. Ова навистина придонесува за доверба и мотивација… Ви благодариме на сите што помагаат! Ви благодариме на сите што ги ценат животот и слободата исто како и Украинците !“, рече Зеленски во видеоизјава на Телеграм.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.