Шведска е чекор поблиску до членство во НАТО по гласањето на турскиот парламентарен комитет

Комитетот на турскиот парламент, контролиран од владејачката Партија за правдата и развојот (АКП) на Реџеп Таип Ердоган, гласаше да го поддржи барањето што Шведска го поднесе по руската инвазија на Украина минатата година. Следно е гласањето во парламентот, по што се очекува Ердоган да го потпише нацрт-законот и да се заокружи целиот процес за одобрување на кандидатурата на Шведска за членство во Алијансата

Комитетот за надворешни работи на турскиот парламент ја одобри кандидатурата на Шведска за членство во НАТО. Ова е клучен чекор кон проширување на западниот блок по 19-месечното одложување во кое Анкара бараше отстапки од официјален Стокхолм во врска со безбедноста, обвинувајќи ја Шведска дека прави премалку против луѓето што Турција ги смета за терористи.

Комитетот, контролиран од владејачката Партија за правдата и развојот (АКП) на Реџеп Таип Ердоган, гласаше да го поддржи барањето што Шведска го поднесе по руската инвазија на Украина минатата година.

Следен чекор е гласањето во парламентот на Турција кое се очекува да се одржи во рок од неколку недели и таму да биде одобрена кандидатурата на Шведска за членство во Алијансата. Потоа се очекува турскиот претседател Реџеп Таип Ердоган да го потпише нацрт-законот, со што ќе се заокружи целокупниот процес.

Шведска и Финска аплицираа за членство во НАТО откако Русија ја започна воената инвазија врз Украина во февруари минатата година. Официјална Анкара го ратификуваше членството на Финска, но се спротивстави на Шведска, тврдејќи дека Стокхолм ги штити групите што таа ги смета за терористички.

Во јули годинава Анкара ги повлече своите приговори за приклучувањето на Шведска во НАТО, што од западните лидери беше поздравено како чекор кон единството што сакаат да го покажат во екот на руската агресија.

• Ердоган го достави во парламентот предлогот за ратификација на членството на Шведска во НАТО