Болницата „Ал-Ахли“ била последната функционална болница. Во неа сè уште се лекуваат пациенти, но не се примаат нови.
Ричард Пиперкорн, претставник на СЗО во Газа оваа болница ја нарекува „школка од болница“ и вели дека личи на хоспис кој обезбедува многу ограничена нега
Северниот дел на Газа останал без функционална болница поради недостаток на гориво, медицински персонал и залихи, соопштува Светската здравствена организација (СЗО), пренесува Ројтерс.
Според СЗО, само девет од 36 здравствени установи се делумно функционални во цела Газа.
Сите се концентрирани на југот на Газа.
„Нема функционални болници на север“. Болницата ’Ал-Ахли’ беше последната, но сега таа е минимално функционална. Во неа сè уште се лекуваат пациенти, но не се примаат нови“,
изјави Ричард Пиперкорн, претставник на СЗО во Газа, за новинарите преку видеоврска од Ерусалим.
Опишувајќи ја како „школка од болница“, Пиперкорн рекол дека „Ал-Ахли“ личи на хоспис кој обезбедува многу ограничена нега.
„Има околу 10 вработени, сите се помлади лекари и медицински сестри. Продолжуваат да обезбедуваат основна прва помош, како и да направат нега на рани со слаби ресурси. До пред два дена, таа беше единствената болница каде повредените можеа да се оперираат во северниот дел на Газа и беше преполна со пациенти на кои им беше потребна итна помош“,
рече тој.
Според него, веќе не работат операционите сали поради недостаток на гориво, струја, медицински материјали и здравствени работници, вклучително хирурзи и други специјалисти.
„Телата на жртвите од неодамнешните израелски напади беа наредени во дворот на болницата бидејќи не можеа да им се обезбедат достоинствени погреби“,
додаде тој.
Покрај болницата „Ал-Ахли“, северна Газа имаше уште три други минимално функционални здравствени установи, како болниците „Ал-Шифа“, „Ал Авда“ и „Ал Сахаба“, за кои Пиперкорн рече дека засолниле илјадници раселени луѓе.
Според податоците на Министерството, во просек речиси 300 луѓе гинеле секој ден од почетокот на војната меѓу Хамас и Израел, не сметајќи го седумдневниот прекин на огнот.
Регионалниот директор на Светската здравствена организација за итни случаи, Ричард Бренан, рекол дека овие податоци за бројот на жртви ги смета за веродостојни, пренесува Регионалниот сервис на Радио Слободна Европа, повикувајќи се на Би-би-си.
Лекарите во Газа велат дека бројот на загинати најверојатно ќе биде значително поголем бидејќи актуелните бројки не ги вклучуваат луѓето чии тела се под урнатините на уништените згради или на оние што не се пренесени во болница.
Извор: 360stepeni.mk
