Во октомври, Бугарија воведе данок на рускиот гас што се доставува до ЕУ преку нејзина територија, за кој некои рекоа дека може да ги загрози испораките, меѓу другите, за Унгарија и Србија. Воведената такса е 10,23 евра за мегават-час или приближно 100 кубни метри руски природен гас што транзитира низ земјата
Унгарија ќе стави вето на влезот на Бугарија во Шенген-зоната доколку не го укине данокот за транзит на руски гас, вели унгарскиот министер за надворешни работи Петер Сијарто.
Унгарија јасно ѝ стави до знаење на Бугарија дека ќе стави вето на влезот на земјата во зоната на слободно движење доколку остане во сила данокот на главната унгарска маршрута за увоз на гас, се наведува во соопштението на унгарското МНР, цитирајќи го шефот на унгарската дипломатија Петер Сијарто.
„Изразивме јасен став до Бугарите дека ако данокот остане во сила и ако тие долго време ја загрозуваат безбедноста на снабдувањето со енергија на Унгарија, ќе ставиме вето на нивниот влез во Шенген-зоната“,
нагласува Сијарто.
Западноевропските земји вложија големи напори да се осамостојат од рускиот гас, а Унгарија, земја без море, годишно купува 4,5 милијарди кубни метри гас од Русија, главно преку Бугарија и Србија, според договорот потпишан во 2021 година.
Бугарија и Романија, кои се приклучија на ЕУ во 2007 година, сепак, досега не успеаја да се приклучат на Шенген-зоната и покрај нивните напори.
Во октомври, Бугарија воведе данок на рускиот гас што се доставува до ЕУ преку нејзина територија, за кој некои рекоа дека може да ги загрози испораките, меѓу другите, за Унгарија и Србија.
Воведената такса е 10,23 евра за мегават-час или приближно 100 кубни метри руски природен гас што транзитира низ земјата.
Изминатава недела, според информациите од бугарската Влада што ги пренесе Блумберг, државата планира да се откаже од контроверзната такса за транзит на руски гас низ нејзината територија, со цел да ги подобри односите со членките на Европската Унија и да се приклучи кон Шенген-зоната.
Бугарија ќе го измени законодавството за да го укине данокот додека не најде пристап на ниво на ЕУ за негово спроведување, изјавија за новинарите во понеделникот Бојко Борисов и Кирил Петков, двајцата поранешни премиери, а сега лидери на двете најголеми партии во земјата, пишува Блумберг.
Потегот на бугарската влада во октомври да наметне давачка за намалување на профитот на руската компанија „Газпром“, предизвика загриженост за високите цени и прекините на снабдувањето низ југоисточна Европа. Иако Бугарија допрва треба да наплати какви било плаќања од клиентите на нејзиниот мрежен оператор, унгарските власти тоа го нарекоа непријателски чекор и повикаа на истрага на ЕУ за одлуката.
Реакции за бугарската такса имаше и од македонска страна. Премиерот Димитар Ковачевски неодамна рече дека тоа е нелегално воведена такса која треба да се отстрани и најави дека С Македонија како држава ќе ги искористи сите правни можности кои ѝ стојат на располагање за нејзино отстранување.
Македонскиот шеф на дипломатијата Бујар Османи со неговиот унгарски колега Петер Сијарто, при неговата посета на Северна Македонија минатиот месец, најавија можна заедничка координација на владите на двете земји во насока на преземање конкретни дејствија и чекори со цел отстранување на таксата за руски гас што ја наметна Бугарија.
Извор: 360stepeni.mk
