МОСКВА (АА) – Портпаролката на руското Министерство за надворешни работи, Марија Захарова, изјави дека идеолошките дејствија на Франција довеле до дестабилизација на ситуацијата во некои земји и региони во светот, пренесува Анадолу.
За руската новинска агенција Риа, Захарова ја оцени понудата на францускиот претседател Емануел Макрон за формирање регионална и меѓународна коалиција за борба против терористичките организации.
Наведувајќи дека оваа понуда „може да доведе до ескалација на вооружените конфликти на Блискиот Исток и вмешаност на други земји во прашањето“, Захарова изјави дека Франција „не го гледа коренот“ на проблемот.
„Идеолошкото дејствување на Париз често има спротивен ефект, само доведува до дестабилизација на ситуацијата во некои земји и региони во светот. Доколку Франција навистина сака да придонесе за воспоставување примирје во регионот и да работи на запирање на крвопролевањето, мора да се погрижи прашањето за Палестина – Израел и Блискиот Исток воопшто да е политичко и може да го поддржи нашиот став дека тоа треба да се реши по дипломатски пат. Затоа, ги повикуваме Израелците и Палестинците брзо да започнат директни преговори за да разговараат за сите контроверзни прашања“, рече Захарова.
Таа изјави дека „се залагаат за создавање независна палестинска држава во границите од 1967 година“.
За време на посетата на Израел на 24 октомври, францускиот претседател Емануел Макрон ја повика меѓународната коалиција предводена од Соединетите Американски Држави (САД) против терористичката организација ДЕАШ да се бори и против Хамас, и да формира регионална и меѓународна коалиција за борба против терористичките организации.
