АЛ-КУДС (ЕРУСАЛИМ) (АА) – Палестинското Министерство за здравство соопшти дека болницата на Турско-палестинското пријателство , единствениот центар во кој се лекуваат болни од рак во блокираниот Појас Газа, престанала да работи поради израелските напади, јавува Анадолу.
Палестинската министерка за здравство, Маја Кејле, изјави дека болницата на Турско-палестинското пријателство, која постојано беше мета на израелските напади во Појасот Газа, останала без гориво и поради тоа престанала да работи.
Таа рече дека 16 од 35 болници во Појасот Газа, каде што Израел ја заостри блокадата, ги прекинале своите активности поради недостиг на гориво или бомбардирања.
Кејле рече дека 70 пациенти заболени од рак во болницата на Турско-палестинското пријателство и 2.000 раселени пациенти заболени од рак кои биле изложени на тешко бомбардирање, доживеале катастрофа и траума и дека нивното здравје е сериозно загрозено.
Таа изјави дека 81 пациент од Појасот Газа преку граничниот премин Рафа биле префрлени на лекување во Египет.
Наведувајќи дека најголемиот медицински комплекс во Газа, болницата Шифа, ќе мора да ги прекине активностите за помалку од 24 часа поради недостиг на гориво, Кејле истакна: „Оваа болница обезбедува здравствени услуги за итни случаи, хируршки интервенции, откажување на бубрезите, интензивна нега и бебиња во инкубатор“.
Таа нагласи дека болницата Шифа била засолниште за 50.000 Палестинци раселени во Појасот Газа.
Палестинската министерка ги повтори нејзините повици да се запрат израелските напади, да се достават медицински материјали и лекови и да им се овозможи на доброволните медицински тимови да влезат во Појасот Газа.
