АНКАРА (АА) – Поради израелската наредба за евакуација на регионот и континуираното бомбардирање, 70 отсто од населението во северна Газа сега е лишено од здравствена заштита, соопшти денес Министерството за здравство во Појасот Газа, јавува Анадолу.
„Откако Обединетите нации ги евакуираа своите центри и престанаа да обезбедуваат здравствена заштита, 70 отсто од населението во Северна Газа сега е лишено од медицинска нега“, се вели во соопштението на Министерството.
Во петокот, израелската војска предупреди над 1 милион луѓе да се евакуираат од северна Газа кон југ, поради најверојатна копнена операција.
Наредбата беше широко осудена, при што ОН и другите меѓународни актери предупредија дека тоа ќе доведе до хуманитарна катастрофа, а болниците во Газа велат дека многу пациенти не се во состојба да патуваат.
Строгата израелска блокада на Газа од минатата недела – со исклучување на водата, електричната енергија, дотурот на храна и медицински материјали – исто така има клучно влијание врз пружањето здравствени услуги.
