ГАЗА (АА) – Израелски воени авиони рано утрово спроведоа интензивни воздушни напади во северниот дел на Газа, по што се пријавени повеќе загинати, јавува Анадолу.
Нападите беа насочени кон неколку куќи и објекти во бегалскиот камп Џабалија и населбата Ал-Машрух во Беит Лахиа, јави репортерот на Анадолу.
Во нападите загинале десетици Палестинци. Палестинското Министерство за здравство допрва треба да го потврди бројот на жртви.
Израелската војска продолжи и со артилериско гранатирање од бродовите и тенковите долж источниот и западниот дел на Појасот Газа, извести дописникот на Анадолу.
Ракета е истрелана и од Појасот Газа кон градот Ашкелон во јужен Израел, регион во непосредна близина на Појасот.
Вчера (петок), израелската војска предупреди 1,1 милион жители во северниот дел на Газа да се евакуираат „во рок од 24 часа“ кон југ.
Обединетите нации (ОН) предупредија дека ќе биде невозможно Палестинците да ја послушаат наредбата и да го напуштат северот без „погубни хуманитарни последици“.
Пред една недела, израелските сили започнаа континуирана и силна воена кампања против Појасот Газа како одговор на воената офанзива на палестинската група Хамас на израелски територии.
Конфликтот започна минатата сабота кога Хамас ја започна операцијата „Поплава Ал Акса“ против Израел, ненадеен напад од повеќе страни, со лансирање ракети и инфилтрација во Израел преку копно, море и воздух.
Хамас соопшти дека операцијата е одмазда за рациите во џамијата „Ал Акса“ во окупираниот Источен Кудс (Ерусалим) и зголеменото насилство на еврејските доселеници врз Палестинците.
Потоа израелската војска ја започна операцијата „Железни мечеви“ против позиции на Хамас во Појасот Газа.
Одговорот на Израел се прошири со прекин на снабдувањето со вода и електрична енергија за Газа, дополнително влошувајќи ги условите за живот во областа што е под опсада од 2007 година.
Од избувнувањето на судирот загинаа повеќе од 3.300 лица, од кои 1.900 Палестинци и 1.400 Израелци.
