БРИСЕЛ (АА) – Поддржувајќи го повикот на Обединетите нации (ОН), Европската комисија денес соопшти дека ЕУ е подготвена да се заложи за отворање на хуманитарен коридор кон Газа, известува Анадолу.
На конференцијата за новинари што ја организираше Европската комисија, главниот портпарол Ерик Мамер потврди дека ЕУ ја дели „загриженоста поради влошувањето на хуманитарната ситуација во Газа, особено поради недостатокот на вода, храна, медицински материјали, гориво и струја.“
„ЕУ го поддржува повикот на генералниот секретар на ОН (Антонио) Гутереш и подготвена е да ги поддржи напорите на ОН за помош во ублажувањето на ситуацијата“, рече Мамер.
Тој објасни дека тоа вклучува „охрабрување на создавање на хуманитарен коридор и овозможување на испорака на итно потребната хуманитарна помош“.
Тој ја повтори осудата на ЕУ „на насилните и неселективните терористички напади на Хамас ширум Израел“, и подвлече дека „Израел има право да се брани во согласност со меѓународното хуманитарно право“.
Истовремено нагласи дека цивилите мораат да бидат „претходно предупредени за претстојните воени операции, овозможувајќи им да заминат и тоа е она што Израел го стори.“
Тој напомена и дека овие потези би требало да овозможат избегнување на „силни хуманитарни последици.“
„Хамас не би требало да ги спречи луѓето да заминат и не треба да ги користи како жив штит“, рече Мамер.
