ГАЗА (АА) – Бригадите Ал-Касам на военото крило на палестинската група Хамас денес објавија дека 13 заложници, кои беа заробени во саботата, загинале во израелските напади врз Газа во последните 24 часа, јавува Анадолу.
Во краткото соопштение се наведува дека меѓу загинатите заробеници имало и странци, но нивната националност не е наведена.
„Шест од нив загинаа во северниот дел на Газа, седум во градот Газа и тројца во други подрачја што беа под израелски напади“, се додава во соопштението.
Не е познат точниот број на израелски заробеници, вклучително и странци, кои во моментов се наоѓаат во Газа.
Ситуацијата ескалираше во Појасот Газа по нападите на палестинската група Хамас врз израелските градови во саботата.
Военото крило на Хамас, бригадите Ал-Касам, во саботата наутро започна сеопфатна операција наречена „Поплава Ал Акса“.
Израел возврати со масовни воздушни напади врз Газа.
Бројот на загинати Палестинци во израелското бомбардирање на Газа достигна 1.537, додека 6.612 лица се повредени.
Најмалку 1.300 Израелци загинаа, а 3.300 се повредени во нападите од Газа.
