ВАШИНГТОН (АА) – Претседателот на САД, Џо Бајден, изјави дека неговата земја е подготвена да испрати дополнителни воени средства во регионот, со цел да го засили Израел среде растечкиот судир со Хамас, известува Анадолу.
Бајден укажа на својата одлука за распоредување на ударна група со носачот на авиони „USS Gerald R. Ford“ во источен Медитеран и зголемување на американското присуство во регионот, додавајќи дека САД е подготвен да уфрли и дополнителни средства по потреба.
„Дозволете ми уште еднаш да кажам. За секоја земја, за секоја организација која мисли да ја искористи ситуацијата, имам еден збор. Немојте. Нашите срца можеби се скршени, но нашата одлука е јасна. Нека нема сомнеж. САД го чуваат грбот на Израел. Ќе се погрижиме еврејската и демократска држава Израел да може да се брани денес, утре, како што тоа отсекогаш сме го правеле“, порача претседателот Бајден од Белата куќа.
Израелските официјални лица проценуваат дека повеќе од 1.200 Израелци загинаа во нападите на Хамас врз градовите во близина на појасот Газа, објави весникот „Yedioth Ahronoth“, наведувајќи дека Хамас заробил околу 200 Израелци.
Меѓу убиените има и 14 државјани на САД, а засега не е познато колку американски државјани има меѓу заробениците.
