АНКАРА (АА) – Израелската војска денес објави дека од избивањето на борбите со палестинската група Хамас за време на викендот загинале 123 војници, пренесува Анадолу.
Порталот „Тајмс оф Израел“ пренесе дека израелската војска ги објавила имињата на уште 38 војници што загинале во борбите во изминатите три дена, со што вкупниот број достигна 123.
Вкупниот број на досега загинати Израелци изнесува 900, а бројот на ранети 2.616.
Што се однесува до израелските заробеници во Газа, израелските власти не ја наведоа бројката. Израелската војска објави дека известила повеќе од 100 семејства дека нивните членови се заробени од Хамас, а израелскиот амбасадор во Обединетите нации (ОН), Гилад Ердан, процени дека бројот на израелски заложници е меѓу 100 и 150.
Военото крило на Хамас, Бригадите Ал-Касам, во саботата наутро започна сеопфатна операција наречена „Поплава Ал Акса“. Илјадници ракети беа истрелани од Газа кон Израел, а вооружени групи влегоа во населените места во регионот.
Групата соопшти дека операцијата е одговор на израелските напади во комплексот на џамијата „Ал Акса“ во окупираниот Источен Ал-Кудс (Ерусалим) и зголеменото насилство од доселениците.
Бројот на загинати Палестинците од нападите на израелските сили во Газа се искачи на 704, од кои 143 деца и 105 жени, соопшти рано утрово Министерството за здравство во Газа. Се наведува дека бројот на ранети се искачил на околу 4.000.
