КУДС (АА) – Израелската армија соопшти дека околу илјада палестински вооружени борци се инфилтрирале од Газа во Израел и влегле во 20 населби и 11 воени бази, јавува Анадолу.
Портпаролот на израелската армија за Анадолу изјави дека продолжуваат вооружените судири меѓу израелската армија и палестинските борци на израелска територија во близина на границата со Газа.
Во соопштението се наведува дека во синоќешните судири во градот Беери учествувале меѓу 70 и 90 вооружени борци и дека судирите се во тек, а палестинските групи не успеале целосно да се инфилтрираат во градот.
Израелскиот јавен сервис КАН објави дека израелската војска соопштила дека од 7 октомври во Израел од Газа се инфилтрирале меѓу 800 и 1.000 вооружени палестински борци и дека влегле во повеќе од 80 гранични точки во 20 населби и 11 воени бази.
Исто така, се наведува и дека во моментов се водат судири на седум локалитети во околината на Газа.
Израелската армија тврди дека палестинските борци најверојатно ископале тунели под границата и на тој начин влегуваат во населбата Беери.
Израелските сили вчера ги евакуираа Израелците од 24 населени места во близина на границата со Газа, вклучително и Беери, а евакуациите сѐ уште траат.
