ПАРИЗ (АА) – Француската Влада вчера одлучи да ја распушти крајнодесничарската католичка партија Цивитас, обвинувајќи ја дека заговара војна против државата, поттикнува омраза во општеството кон ЛГБТК лицата, исламофобијата и антисемитизмот, пренесува Анадолу.
Портпаролот на Владата, Оливие Веран, по состанокот на Кабинетот ја објави одлуката за распуштање на Цивитас, која дејствуваше како здружение од 1999 година пред да стане политичка партија во 2016 година.
„Цивитас ги гледа човековите права како средство за поткопување на христијанската цивилизација“, рече Веран, додавајќи дека организацијата е штетна поради промовирање омраза, анти-ЛГБТК чувства, исламофобија и антисемитска реторика.
Тој го обвини движењето дека се обидува да „објави војна на државата“, вклучително и употреба на „сила“.
Министерот за внатрешни работи, Жералд Дарманин, исто така, на платформата Х изјави дека во Франција нема место за вредностите што ги промовира движењето.
Во последните години, движењето Цивитас стана познато по својата антиеврејска и антимуслиманска реторика.
Дарманин повика на распуштање на партијата на 8 август како одговор на антиеврејските коментари на членот на Цивитас, Пјер Хилард.
Движењето, кое себеси се нарекува „традиционалистичко католичко лоби“, има за цел „рехристијанизација на Франција“ и користеше антиеврејска и антимуслиманска реторика.
