АНКАРА (АА) – Јужнокорејскиот претседател Јун Сук Јеол денес предупреди дека на севернокорејскиот режим „ќе му се стави крај“ доколку користи нуклеарно оружје, јавува Анадолу.
Обраќајќи се на церемонијата во воздухопловната база во Сеул по повод 75. Ден на вооружените сили, Јун рече дека Северна Кореја треба да сфати дека нејзиното нуклеарно оружје никогаш не ќе може да ја гарантира нејзината безбедност.
„Доколку Северна Кореја користи нуклеарно оружје, нејзиниот режим ќе биде доведен до крај со огромен одговор од јужнокорејско-американската алијанса“, изјави Јун.
Претседателот рече дека Пјонгјанг ги надградува своите нуклеарни и ракетни капацитети и покрај предупредувањата на меѓународната заедница.
Јун вети дополнително зајакнување на безбедносната соработка со САД и Јапонија.
Јужнокорејската војска, исто така, денес првпат од 2013 година ќе одржи масовна воена парада во центарот на Сеул, на која ќе учествуваат околу 4.000 војници и над 170 парчиња воена опрема, вклучително и борбени тенкови К2, новата ракета со „висока моќност“ на земјата и борбени беспилотни летала, објави агенцијата.
Последната изјава на Јун е дадена откако Северна Кореја во понеделникот рече дека неодамнешниот напредок во нејзините билатерални односи со Русија е нејзино „суверено“ право и „темел за регионална стабилност“.
За време на обраќањето на Генералното собрание на ОН во Њујорк минатата недела, Јун рече дека каков било договор за оружје меѓу Северна Кореја и Русија би бил еднаков на „директна провокација“ против Сеул.
Севернокорејскиот лидер Ким Џонг-ун се врати во Пјонгјанг минатата недела по еднонеделното патување во Русија.
