БРИСЕЛ (АА) – Европската Унија (ЕУ) ја покани Русија повторно да се вклучи во Иницијативата за жито преку Црно Море, јавува Анадолу.
Петер Стано, еден од портпаролите на Европската комисија, ја коментираше средбата меѓу турскиот претседател Реџеп Таип Ердоган и рускиот претседател Владимир Путин во Сочи, Русија.
Тој нагласи дека ЕУ очекува Русија да се врати на Договорот од кој се повлече на 17 јули и да ги запре нападите што го спречуваат извозот на украинско жито на светските пазари.
„Русија го блокира најпогодниот пат за извоз на украинско жито на светските пазари. Ова е неприфатливо. Русија во моментов ја напаѓа пристанишната инфраструктура, алтернативните маршрути за извоз на жито од Украина“, рече Стано и додаде:
„Русија не само што го блокира украинското жито туку и профитира од тоа. Имено, тоа предизвикува зголемување на глобалните цени и го зголемуваат сопствениот извоз и остваруваат огромни приходи. Изјавите дека ЕУ го спречува рускиот извоз се дезинформации, манипулации и лаги. Русија повторно ќе се вклучи во Црноморските иницијативи за жито.“
Турскиот претседател Реџеп Таип Ердоган денес пристигна во рускиот приморски град Сочи како дел од еднодневната работна посета, со цел обновување на Црноморскиот договор за жито.
На 17 јули Русија го суспендираше своето учество во Договорот, со посредство на Туркије и ОН, за обновување на извозот на жито од трите украински пристаништа на Црно Море кој беше запрен по војната во Украина, која започна во февруари 2022 година.
Москва се пожали дека Западот не ги исполнил своите обврски во врска со рускиот извоз на жито и дека не се испорачува доволно украинско жито во земјите на кои им е потребно.
Потврдувајќи ја важноста од исполнувањето на руските барања за извоз на нивно жито и ѓубрива, Туркије смета дека нема алтернатива за оваа Иницијатива.
Официјална Анкара презеде интензивни дипломатски напори за обновување на Договорот од јули 2022 година и, исто така, ги повика Киев и Москва да преговараат за да се стави крај на војната преку преговори.
