Премиерот на Република Косово, Албин Курти, денеска на конференција за медиумите зборуваше во врска со изјавата на вицепремиерот Бесник Бислими дека Косово нема да распише избори на северот на Косово додека ЕУ не ги укине мерките против Косово.
Курти рече дека Бислими и Лајчак се спогодиле за реализација на критериумите на Европската Унија од 3 јуни и вели дека тој договор треба да се спроведе.
Косовскиот премиер не верува дека некој може да очекува нови избори на северот без целосна деескалација.
„Станува збор за деескалација. Не верувам дека некој очекува дека без целосна деескалација ќе имаме избори на север. Сепак, ние продолжуваме со нашата работа, се подготвуваме за избори на северот на Косово“,
рече Курти.
Тој додаде дека Косово очекува што поскоро да се отстранат мерките на ЕУ. Во врска со изјавата на вицепремиерот Бислими, Курти рече дека не се работи за услови туку за логичен редослед на работите и за спроведување на договорот меѓу Бислими и Лајчак.
„Мерките што се преземени против нас, а кои се нарекуваат и привремени и реверзибилни, секако очекуваме да бидат отстранети што е можно поскоро и логично е тоа да се случи однапред. Не се работи за услови, туку за логичен редослед на нештата, кој како прв чекор мора да го има спроведувањето на договорот меѓу Бислими и Лајчак од 3 јуни, што секако ја создава таа минимална нормалност за предвремени избори“,
вели Курти.
Курти додаде дека не е задоволен од ослободувањето на Србите осомничени за напади на северот велејќи дека генерално не е задоволен од работата на Обвинителството.
Извор: 360stepeni.mk
