КАРТУМ (АА) – Најмалку девет лица загинаа во авионската несреќа што се случи во суданскиот крајбрежен град Порт Судан, објави суданската војска, известува Анадолу.
Војската наведе дека до несреќата дошло поради технички дефект, информирајќи дека во авионот се наоѓале четири воени лица.
„Цивилниот авион ‘Антонов’ денес се урна на аеродромот ‘Порт Судан’ поради технички дефект. Животот го загубија деветмина, од кои четири воени лица. Едно дете ја преживеа несреќата“, соопшти канцеларијата на портпаролот на Вооружените сили на Судан.
Порт Судан е еден од градовите што се под контрола на суданската војска од избивањето на војната во земјата на 15 април оваа година.
Судан е опустошен од судирите меѓу војската и паравоените Сили за брза поддршка од април досега, во кои, според податоците на локалните лекари, животот го загубиле околу 3.000 цивили, а илјадници се повредени.
Неколку договори за прекин на огнот меѓу завојуваните страни, во кои посредуваа саудиски и американски претставници, не успеаја да му стават крај на насилството.
Меѓународната организација за миграции (ИОМ) проценува дека речиси 3 милиони луѓе се раселени поради судирите во Судан.
Во јули генералниот секретар на Обединетите нации (ОН), Антонио Гутереш, предупреди дека судирот во Судан би можел да прерасне во граѓанска војна.
Извор: www.aa.com.tr
