МОСКВА (АА) – Рускиот претседател Владимир Путин изјави дека Украина загубила десетици илјади војници во контранападите што ги изведува подолго време, јавува Анадолу.
Тој одржа онлајн состанок со рускиот Совет за безбедност за војната во Украина.
Путин наведе дека испораката на оружје за Украина може да продолжи, но тоа само го продолжува конфликтот.
„Залихите на поранешната советска муниција и оружје во некои земји на НАТО во голема мера се исцрпени. Постојните производствени капацитети на Западот, исто така, не се доволни за брзо дополнување на резервите на опрема и муниција“, рече рускиот претседател.
„Јасно е дека западните куратори на режимот во Киев се разочарани од резултатите на таканаречениот контранапад што го најавија украинските власти. Не помагаат ниту огромните ресурси што се влеваат во Киев ниту западното оружје “, рече Путин.
Тој наведе дека Украина претрпела значителни загуби поради „самоубиствените напади“.
„Формациите на украинската армија претрпеа големи загуби како резултат на самоубиствени напади. Овие загуби изнесуваат десетици илјади“, рече Путин.
Осврнувајќи се на извештаите дека Полска планира да прати војници во Украина, Путин рече: „Што се однесува до полските лидери, тие веројатно планираат да формираат коалиција под чадорот на НАТО и потоа да си отсечат големо парче за себе.“
Потенцирајќи дека Белорусија е сојузник на Русија, Путин рече дека „агресијата против Белорусија значи агресија врз Русија“.
„Ќе одговориме со сите средства што ни стојат на располагање. Ќе кажам само едно, ова е многу опасна игра и оние што прават такви планови треба да размислат за последиците“, додаде рускиот претседател.
Извор: www.aa.com.tr
