КАРТУМ (АА) – Денес продолжија жестоките судири меѓу суданската армија и воената група Сили за брза поддршка (РСФ) во главниот град Картум, изјавија очевидци, јавува Анадолу.
Судири се пријавени во близина на основно училиште во Јужен Картум, во кои армиските сили користеле артилериско гранатирање за да ги потиснат борците на РСФ, велат очевидци.
Тешки борби се пријавени и во градот Бахри, северно од Картум. Од неколку области во градот се забележани издигнувања на чад.
Во градот Омдурман армиските сили започнаа операција за пребарување на членовите на паравоената група, изјавија очевидци.
Сè уште нема извештаи за жртви.
Судан е опустошен од борбите меѓу армијата и РСФ од април, во судири во кој досега загинаа речиси 1.000 цивили, а беа повредени 5.000, според податоците на локалните медицински лица.
Меѓународната организација за миграција (ИОМ) проценува дека во конфликтот се раселени повеќе од 2,5 милиони луѓе.
Неколку иницијативи за прекин на огнот со посредство на саудиски и американски посредници не успеаја да ги запрат борбите меѓу двата воени ривала.
Судан е без функционална влада од октомври 2021 година, кога војската ја собори преодната Влада на премиерот Абдула Хамдок и прогласи вонредна состојба, потег што политичките сили го квалификуваа како „државен удар“.
Транзицискиот период на Судан, кој започна во август 2019 година по соборувањето на претседателот Омар ал-Башир, требаше да заврши со избори на почетокот на 2024 година.
Извор: www.aa.com.tr
