КИEВ (АА) – Бројот на загинати се искачи на шест, додека 25 лица се повредени утринава во ракетен напад врз градот Криви Рог во областа Днепропетровск, во југоисточна Украина, пренесува Анадолу.
„Ракетниот напад на Криви Рог однесе шест животи. Спасувачките напори продолжуваат во уништен приватен стан. Тие сè уште трагаат по луѓе што можеби се под урнатините“, изјави гувернерот Серхи Лисак на Телеграм, додавајќи дека 19 од 25 повредени се хоспитализирани.
Гувернерот Серхиј Лисак на Телеграм изјави дека за време на нападот на Криви Рог биле оштетени цивилни згради, вклучително и петкатница.
Тој рече и дека се опожарени становите во зградата меѓу првиот и петтиот кат и дека пожарот зафатил 700 квадратни метри, кој активно го гаснат пожарникарите и спасувачите на терен.
Украинскиот претседател Владимир Зеленски по повод последниот напад на Телеграм најави дека на Русија никогаш нема да ѝ биде простено и дека „таа ќе сноси одговорност за секоја ракета што ќе ја лансира“.
„За жал, има мртви и повредени. Продолжува операцијата за спасување во Криви Рог. Сочувство до сите што ги загубија своите најблиски“, рече Зеленски.
Според податоците на Обединетите нации, во војната меѓу Русија и Украина, која започна во февруари 2022 година, загинаа повеќе од 8.900 цивили, а повеќе од 15.400 се повредени.
Извор: www.aa.com.tr
