Од Министерството за правда кратко соопштија дека предлогот сега ќе биде доставен до Владата, за понатаму иницијативата да се проследи до Собранието каде што ќе треба да ги помине сите работни тела
Предлог-иницијативата за уставни измени со кои Бугарите и други народи ќе се внесат во Преамбулата од Уставот доби зелено светло од работната група.
Сега, на ред е Владата предлогот да го достави во Собранието.
„Работната група на денешната седница ја усвои Предлог-иницијативата за потребата од измени на Уставот со насоки за изменување и дополнување на Уставот на Република Северна Македонија. Предлогот ќе се достави до Владата која ќе треба да ја проследи иницијативата до Собранието каде ќе ги помине сите работни тела“,
соопштија од Министерството за правда попладнево.
Додека работната група денеска го усвојувала текстот на предлогот за уставни измени, од власта и опозицијата во јавноста ги повторија своите ставови.
Од ВМРО-ДПМНЕ порачаа дека под овие услови и под бугарски диктат нема да се случи промена на Уставот, а партискиот лидер Христијан Мицкоски го повика премиерот Димитар Ковачевски да ја достави иницијативата до Собранието, а ако таму нема двотретинско мнозинство, да си поднесе оставка.
Ковачевски, пак, на седница за пратенички прашања уште еднаш упати порака дека партиите треба да го поддржат европскиот пат на државата и да им овозможат европска иднина на младите. Побара и сериозно да се сфатат пораките од САД и од членките на ЕУ и на НАТО за ова прашање.
„Сакам да ве уверам вас, како што ме уверија и мене во САД, дека за уставните измени, внесувањето во нашата Преамбула – други делови од народи кои изразиле желба за такво нешто, со оглед на тоа што ние веќе во нашата Преамбула имаме делови од други народи – дека за тоа имаме силна поддршка од сите наши стратешки партнери, со цел да донесеме одлука којашто ќе биде за нас добра, односно за просперитетот, иднината на државата и на генерации млади кои тука живеат“,
рече Ковачевски.
Пораки денеска стигнаа и од САД и од ЕУ. Американскиот сенатор Крис Марфи, кој денеска одржа низа средби во политичкиот врв во земјава, порача дека државата мора да ги спроведе техничките измени на Уставот за да ја продолжи интеграцијата во ЕУ. Исто така, тој предупреди и дека неспроведувањето на измените во Уставот ќе се одрази на односите помеѓу САД и земјава.
Евроамбасадорот Дејвид Гир, пак, потенцира дека земјава со уставните измени нема да го загуби идентитетот и јазикот. Меѓутоа, покрај промените на Уставот, тој ја нагласи и важноста од реформи.
„Процесот на реформи и нивното импеемнтирање треба да се движи многу брзо. Динамиката на спроведувањето на реформите не е толку брза како што ние би сакале. Што се однесува до уставните измени, прво што треба да се направи е да се демистифицира сиот тој процес. Со самото придвижување напред, вашата земја не го губи идентитетот, не го губи јазикот, ниту пак историјата“,
изјави денеска Гир при денешната посета на Крушево.
ИЗВОР: 360stepeni.mk
