АНКАРА (АА) – Вашингтон своевремено ѝ предложи на Туркије да го испрати на Украина одбранбениот систем С-400 што го купи од Русија, но Анкара го одби овој предлог, рече турскиот министер за надворешни работи Мевлут Чавушоглу, известува Анадолу.
„САД бараат од нас да го испратиме С-400 во Украина, но ние одговоривме не“, рече Чавушоглу, објаснувајќи дека овие предлози се неприфатливи бидејќи се настојува да се урне турскиот суверенитет.
Турските официјални лица во повеќе наврати говореа дека нацијата ги купи системите С-400 заради национална безбедност и дека ниту една друга земја нема право да се меша во тоа.
Во 2017 година, кога долготрајните напори да купи систем за противвоздушна одбрана од САД се покажаа залудни, Туркије потпиша договор со Русија за набавка на најсовремениот систем С-400.
Американските официјални лица се противеа на поставувањето на овој ракетен систем во Туркије, тврдејќи дека С-400 би бил некомпатибилен со системите на НАТО.
Туркије меѓутоа нагласи дека С-400 нема да биде интегриран во системите на НАТО и дека нема да претставува закана за Алијансата или нејзиното вооружување. Анкара во повеќе наврати предложи формирање комисија што би го разјаснила ова прашање.
Запрашан за враќањето во програмата Ф-35, Чавушоглу рече дека Анкара не сака да се врати во програмата, туку сака да се врати од Вашингтон со парите што ги плати за борбените авиони пред да излезе од програмата.
„Анкара сега произведува сопствени авиони“, објасни тој, додавајќи дека Туркије исто така сака да ги унапреди врските со САД и дека за таа цел се воспоставени потребните механизми.
Според неговите зборови, Туркије сака да купи авиони Ф-16 и комплети за модернизација од САД.
Анкара побара авиони Ф-16 и комплети за модернизација од САД во октомври 2021. Договорот вреден 6 милијарди ќе вклучува 40 млазни авиони и комплети за модернизација на 79 воени авиони што турското воено воздухопловство веќе ги има.
Извор: www.aa.com.tr
