Единаесет лица од повредените во пукањата што се случија изминативе денови во Србија се наоѓаат во Ургентниот центар, каде во тек се оперативни зафати кај дел од пациентите, пренесе РТС. Дел од пациентите како што соопшти српската министерка за здравство, Даница Грујичиќ се уште се во критична и животозагрозувачка состојба.
„Што се однесува до повредените во престрелката кај Младеновац и Смедерево, кои се во КЦ, две девојчиња се уште се во животна опасност. Девојката која имаше повреда на главата, иако постоперативниот скенер е навистина одличен, за жал и е оштетено левото око, куршумот останал таму. Таа се уште е под седативи, па не можеме целосно да ја процениме нејзината состојба додека не почнеме да ја будиме,“
изјави Грујичиќ.
Критично е и девојчето кое имаше повеќе абдоминални повреди, додаде таа и посочи дека денеска ќе и биде извршена нова интервенција.
„Момчето кое имаше повреда на феморалните артерии и вените на нозете е префрлено на Клиниката за васкуларна хирургија, ќе мора да добие дополнителни интервенции. Мажот кој имаше повреда на градниот кош и повреда на рбетот засега е стабилен, екстубиран и свесен. Разговарав со него, но за жал има параплегија. Што се однесува до момчето што дојде од Смедерево, направена е торакална дренажа, исто така е стабилен и екстубиран,“
додаде министерката.
Во Србија денеска е трет ден на жалост поради трагедијата во ОУ „Владислав Рибникар“ во Белград и масовното убиство во селата околу Смедерево и Младеновац. Три од жртвите ќе бидат погребани денеска во Дубона, а на белградските гробишта вчера беа погребани четворица ученици и работникот од обезбедувањето во училиштето во Врачар. Во Мало Орашје беа погребани пет млади луѓе.
Извор: 360stepeni.mk
