Нема докази дека експлозијата на гасоводот што ги поврзува Литванија и Летонија е последица на напад, велат од „Амбер Грид“

Според првичната проценка нема знаци на напад како причина за експлозијата, но истрагата ќе ги вклучи сите можни опции, велат од компанијата „Амбер Грид“

Засега нема докази дека експлозијата на гасоводот што ги поврзува Литванија и Летонија е последица на напад, изјави извршниот директор на „Амбер Грид“, компанијата задолжена за транспорт на гас од Литванија, Немунас Бикнијус.

„Не гледаме знаци на некакво потенцијално влијание однадвор. Сите причини ќе бидат истражени и разјаснети во наредните денови“,

рече Бикнијус.

Според првичната проценка, додаде тој, не гледаме напад како причина за експлозијата, но истрагата ќе ги вклучи сите можни опции.

Пожарот што избувна по експлозијата е изгаснат и повторно е воспоставен транспортот на гас за Летонија.

Литванскиот оператор на системот за транспорт на гас, „Амбер Грид“, попладнево пријави дека дошло до експлозија на гасоводот што ги поврзува Литванија и Летонија.

Операторот на системот истакна дека системот за транспорт на гас се состои од два паралелни гасоводи, при што нагласи дека експлозијата се случила на едниот, додека другиот не е оштетен.