АНКАРА (АА) – Турскиот претседател Реџеп Таип Ердоган изјави дека Туркије е подготвена да даде поддршка во испораката на природен гас за Унгарија преку Трансанадолскиот гасовод (ТАНАП), јавува Анадолу.
Ердоган вчера во Анкара се сретна со унгарската претседателка Каталин Новак, по што беше одржана заедничка прес-конференција.
„Очекуваме Унгарија да продолжи да го поддржува промовирањето позитивна агенда во односите помеѓу Туркије и Европската Унија“, рече Ердоган.
Тој истакна дека Туркије е подготвена да ја поддржи Унгарија во контекст на испорака на природен гас.
„Подготвени сме заедно со Азербејџан да дадеме секаков вид поддршка за испорака на природен гас за Унгарија преку Трансанадолскиот гасовод“, рече Ердоган.
Тој се осврна и на војната во Украина.
„Сакаме што поскоро на масата да донесеме мир помеѓу Украина и Русија и на тој начин да се заврши војната“, рече Ердоган.
Унгарската претседателка Каталин Новак истакна дека нејзината земја цврсто го поддржува проширувањето на НАТО.
Рече дека една од темите на состанокот била соработката во областа на енергетиката.
„Туркије ѝ помага на Унгарија во енергетската сигурност. Туркије има незаменлива важност во енергетската сигурност на Унгарија. Ни треба ‘Турски тек’ бидејќи доаѓа преку Туркије и сакаме да се заблагодариме и да кажеме дека сметаме на ваша поддршка по ова прашање“, рече Новак.
Извор: www.aa.com.tr
