Улогата на жените во земјоделството, зачувувањето на традицијата и можностите за современо производство беа во фокусот на манифестацијата „Рурална жена – силата на Пелагонија“, на која денеска присуствуваше градоначалникот на Битола, Тони Коњановски.
Настанот, во организација на здружението „Современо земјоделство“, преку панел-дискусии ги отвори темите за можностите и предизвиците на дигиталното земјоделство и за жената како двигател на современото земјоделство и руралниот развој.
Во своето обраќање, Коњановски го истакна придонесот на руралните жени во земјоделското производство, локалната економија и развојот на руралните средини.
Тој нагласи дека и во време на дигитализација и примена на современи начини на работа, традиционалното производство задржува посебна вредност. Во тој контекст ја посочи умешноста на жените, кои ги пренесуваат знаењата и вештините наследени од своите мајки и баби.
„Руралната жена е уникатна приказна во тој дел, каде само таа може да го направи она што денеска има посебна вредност, а тоа се производите подготвени од вредните раце и нејзината умешност“, истакна Коњановски.
Во рамките на манифестацијата беа доделени признанија на жени кои придонесуваат кон развојот на агросекторот.
