Роберто Манчини со пораз го започна новиот мандат на клупата на италијанската репрезентација. Аѕурите на домашен терен загубија со 0-2 од Белгија во првото коло од Лигата на нации, иако италијанскиот селектор смета дека неговиот тим имал доволно можности да стигне до израмнување.
Италија одигра две сосема различни полувремиња. Белгија беше подобар противник во првите 45 минути и успеваше да создава проблеми пред голот на домаќинот. По паузата, сепак, Италијанците ја презедоа иницијативата и го диктираа темпото.
„Белгија во првото полувреме играше подобро од нас и имавме одредени потешкотии, но во вториот дел ние ја диктиравме играта, додека тие се мачеа.
Со оглед на шансите што ги создадовме, можевме да израмниме, но го примивме вториот гол од контранапад по наша грешка. Дали свирежите беа заслужени? Кога ќе загубите, тие се случуваат, но не беше сè негативно“, изјави Манчини.
Италијанскиот селектор призна дека неговиот тим имал проблеми во првиот дел, но нагласи дека потребно е време за новата екипа да ја достигне посакуваната форма.
„Кога Белгија постигна гол за 0-2, натпреварот беше завршен. Сега едноставно мораме да работиме, бидејќи нè очекуваат тешки натпревари како овој. Потребно е време, но остануваат уште пет натпревари во Лигата на нации и ќе се обидеме да ги добиеме. Не смееме да дозволиме еден или два порази да нè обесхрабрат“, додаде тој.
Манчини се осврна и на неуспехот во квалификациите за Светското првенство, кој, според него, сè уште влијае врз атмосферата околу националниот тим.
„Мораме да го оставиме тоа зад нас. Не смееме да живееме во минатото, туку треба да задржиме позитивен став и постојано да размислуваме за тоа што следува, бидејќи она што се случи веќе не можеме да го промениме“, порача Манчини.
Италија ќе има шанса за поправен испит во понеделник, кога во Измир ќе гостува кај Турција во второто коло од Лигата на нации.
Извор: sportmanija.mk
