Праведната енергетска транзиција мора да значи конкретни инвестиции, модерна инфраструктура и сигурна енергетска иднина, порача министерката за енергетика, рударство и минерални суровини Сања Божиновска.
Таа информираше дека е одржан координативен состанок со партнерите на Инвестициската платформа за праведна енергетска транзиција – JETIP, на кој бил разгледан досегашниот напредок и биле утврдени следните чекори за реализација на приоритетните инвестиции.
Во моментов, портфолиото на JETIP опфаќа 81 проект со вкупна вредност од околу 1,77 милијарди евра. Од оваа сума, за проекти во вредност од околу 460 милиони евра веќе е обезбедено финансирање.
„Продолжуваме со инвестиции и подготовка на проекти во обновливи извори, електропреносната мрежа и складирањето на енергија, паралелно со унапредување на регулаторната рамка“, истакна Божиновска.
Како особено важни документи за понатамошниот развој на енергетскиот сектор ги посочи Стратегијата за декарбонизација на ЕСМ и Мастер планот за развој на електропреносната мрежа на МЕПСО.
Според Божиновска, овие документи треба да создадат основа производството на електрична енергија, електропреносната мрежа и складирањето да се развиваат координирано, паралелно со постепената транзиција од јаглен кон почисти извори на енергија.
JETIP е национална платформа за координација на инвестициите и финансирањето поврзани со енергетската транзиција, со фокус на обновливите извори, модернизацијата на мрежата, складирањето и поддршката на заедниците и работниците погодени од транзицијата. (jetip.mk)
