Украински ракети синоќа ја погодија руската Белгородска област, при што загинаа шест лица, а четворица се повредени. Меѓу повредените е и 14-годишно дете, соопшти вршителот на должноста гувернер, Александар Шуваев. Нападот уследи само една ноќ откако руските власти соопштија дека Украина извршила „најмасовен“ напад годинава, во кој загинале најмалку седум луѓе, пренесува „Би-би-си“.
Во исто време, во руските напади врз Украина во саботата вечерта загинале најмалку седум луѓе, а повеќе од 39 биле повредени.
Русија ја започна целосната инвазија врз Украина во февруари 2022 година и сега контролира околу една петтина од украинската територија.
Во најновите украински напади биле запалени објект и оштетен автомобил во селото Колосково, во областа Валујски, во близина на руско-украинската граница, соопшти Шуваев.
Повреденото дете било пренесено во болница, додека на уште двајца луѓе им била укажана медицинска помош.
Украина во последните неколку недели ги засили нападите со дронови врз цели длабоко на руска територија.
Околу 820 украински дронови во саботата беа лансирани кон Русија, од кои 600 биле насочени кон Москва, според гувернерот на Московската Област. Тој нападот го опиша како „еден од најмасовните напади со дронови во поновата историја“ на руската престолнина.
Во нападите во саботата вечерта пет луѓе загинале во Ростовската Област, соопшти гувернерот. Во Белгород, пак, била убиена жена во напад врз автобус, додека 83-годишен маж загинал во напад со дрон во Московската Област.
Погоден бил и магацин на руската онлајн-продавница „Вајлдберис“. Украина од јули повеќепати ја гаѓа оваа компанија, која често се опишува како руска верзија на „Амазон“.
Украинското Министерство за одбрана соопшти дека во последниот напад биле „онеспособени“ седум од 10-те најголеми логистички центри на „Вајлдберис“.
Извор: vecer.mk
