На повидок е договор за Ормунскиот Теснец, кој наскоро би можел да овозможи повторно отворање на овој клучен воден пат и да го обнови извозот на нафта, прекинат за време на петмесечната војна меѓу САД и Иран. Како што вчера објави анонимен американски функционер, постигнат е сериозен напредок во разговорите меѓу Иран и Оман, при што Вашингтон очекува брзо решение кое конечно ќе го врати во нормала поморскиот нафтен сообраќај.
Договорот меѓу Иран и Оман за контрола на стратешкиот воден пат се смета за клучен за постигнување поширок мировен договор.
„Постигнат е напредок меѓу Оман и Иран во врска со Ормуз и наскоро очекуваме договор“, изјави вчера американскиот функционер, пренесен од британските медиуми.
„Откако ќе биде објавен договор што ќе овозможи непречено продолжување на комерцијалниот поморски сообраќај, САД ќе ја укинат блокадата на иранските пристаништа. Како и секогаш, потезите на САД ќе продолжат да зависат од спроведувањето на договорот и да бидат поврзани со исполнувањето на обврските на Иран“, додаде функционерот.
Пред САД и Израел да започнат војна против Иран на 28 февруари, приближно една петтина од вкупната потрошувачка на нафта во светот минуваше низ Ормуската Теснина. Меѓутоа, Иран го искористи конфликтот за наплата на такси за танкерите за нафта и отвора оган врз бродовите што се обидуваа да поминат низ теснината без дозвола.
Прекините во снабдувањето со нафта предизвикаа нагло зголемување на цените на енергијата и ја поттикнаа инфлацијата.
Во последните недели, администрацијата на Трамп постојано сигнализираше дека договорот за отворање на теснината може да биде блиску, но Иран секој пат негираше дека преговорите се во тек. Сè уште не е јасно дали најновите интензивни дипломатски напори ќе резултираат со трајна спогодба.
Нападите на Иран врз бродовите во Ормуската Теснина беа придружени со зголемени напади од страна на неговите јеменски сојузници – Хутите, кои ги гаѓаат бродовите на друга важна транспортна рута за нафта од другата страна на Арапскиот Полуостров помеѓу Црвеното Море и Аденскиот Залив.
Националната нафтена компанија Абу Даби, еден од најголемите светски производители на енергија, вчера соопшти дека 15 нејзини бродови биле погодени во, како што ги нарече, неиспровоцирани напади додека пловеле низ Ормуската Теснина од почетокот на конфликтот. Во нападите, наведуваат од компанијата, еден член на екипаж бил убиен, а 20 други биле ранети.
Извор: vecer.mk
