Полицијата од синоќа трага по исчезнато тримесечно бебе во Германија. Како што потврди портпаролот на полицијата за „БИЛД“, момчето наводно било грабнато од детска количка во текот на ноќта во градот Ренинген.
„Детето било оставено без надзор на кратко. Непознато лице го подигнало од количката и го одвела“, изјави портпаролот на полицијата, Штефен Грабенштајн. Полицијата била известена доцна во четвртокот навечер, а големата полициска операција за пронаоѓање на детето и на осомничениот грабнувач започнала во 23:30 часот. „За жал, во моментов немаме ветувачки траги. Потрагата ја започнавме од местото на злосторството, но секако, детето веќе би можело да биде на сосема друго место“, додаде портпаролот.
На паркингот на супермаркетот „Реве“ (Rewe) во Ренинген е воспоставен главен пункт за итните служби. На терен се распоредени бројни полициски единици, тимови со кучиња за трагање и спасување од целата покраина Баден-Виртемберг, локални претставници на Црвениот крст, Сојузната агенција за техничка помош (THW) и противпожарните бригади. Во потрагата по исчезнатото бебе се вклучени и полициски хеликоптер и неколку дронови.
Извор: vecer.mk
