Градоначалникот на Општина Битола, Тони Коњановски, денеска имаше поздравно обраќање на Факултетот за информатички и комуникациски технологии при Универзитетот „Св. Климент Охридски“ – Битола, по повод почетокот на претприемачката недела насловена „Се развиваме заедно“.
Настанот, кој ќе трае до сабота, има за цел да ги поттикне младите да развиваат стартапи и да придонесат во унапредување на малите и средни претпријатија. Во рамки на неделата, учесниците ќе работат во тимови, а на крајот ќе ги презентираат своите идеи и резултати.
Во своето обраќање, Коњановски истакна дека на Општина Битола, како и на локалните компании и јавни претпријатија, им се потребни луѓе со претприемачки дух, визија и подготвеност да бидат дел од современите текови.
„Потребни ни се кадри кои размислуваат иновативно и имаат храброст да создаваат нови вредности. Само така можеме да изградиме посилна и поконкурентна локална економија“, нагласи Коњановски.
Тој изрази уверување дека ваквите иницијативи ќе ги охрабрат младите да го препознаат сопствениот потенцијал и да го насочат кон реализација на нови и иновативни решенија кои ќе придонесат за подобрување на секојдневието и иднината.
Претприемачката недела „Се развиваме заедно“ претставува платформа за размена на идеи, знаење и искуства, со фокус на развој на претприемништвото и поддршка на младите во нивните бизнис иницијативи.
Извор: zurnal.mk
