Коалицијата ВЛЕН соопшти дека младите сè повеќе се вклучуваат во мерките за вработување и претприемништво, при што значаен дел од новоотворените бизниси се резултат токму на нивната иницијатива.
Според податоците што ги објави коалицијата, во рамки на Оперативниот план за вработување за 2025 година, од околу 13.000 лица предвидени за вклучување, дури 8.576 или 70,9 проценти се млади до 29 години.
Од ВЛЕН потенцираат дека ова е јасен сигнал дека младите активно го бараат своето место на пазарот на трудот и сè повеќе се охрабруваат да започнат сопствен бизнис.
Во рамки на мерката за самовработување, која се смета за една од најатрактивните, од планираните 2.755 нови бизниси, дури 1.896 се отворени од млади лица до 29 години.
„Овие бројки покажуваат дека младите имаат потенцијал, идеи и храброст да создаваат и да придонесуваат кон економскиот развој“, велат од коалицијата.
Од таму додаваат дека поддршката за младите ќе остане приоритет и во наредниот период, со цел да се поттикне нивната економска независност и активна улога во општеството.
