АНКАРА (АА) – Туркије доби огромна солидарност и великодушност од меѓународната заедница по големите земјотреси минатиот месец, изјави денес турскиот министер за надворешни работи Мевлут Чавушоглу, јавува Анадолу.
„Ги видовме огромната солидарност и великодушност на меѓународната заедница. Спасувачките тимови од целиот свет се изложија на ризик да ги спасат жртвите.“
„Ние сме благодарни. Никогаш нема да заборавиме на помошта на нашите пријатели“, рече Чавушоглу на Меѓународната донаторска конференција во Брисел.
Конференцијата е организирана од Европската комисија и шведското претседателство со Советот на Европската Унија за поддршка на жртвите погодени од разорните земјотреси на 6 февруари во Јужна Туркије.
Земјотреси со јачина од 7,7 и 7,6 степени по Рихтер на 6 февруари погодија 11 турски области – Адана, Адијаман, Дијарбакир, Елазиг, Хатај, Газиантеп, Кахраманмараш, Килис, Малатја, Османије и Шанлиурфа – и однесоа животи на повеќе од 50.000 луѓе.
Повеќе од 13,5 милиони луѓе во Туркије се погодени од разорните земјотреси, како и многу други во Северна Сирија.
Туркије сега преминува во фаза на закрепнување и реконструкција, рече Чавушоглу, додавајќи: „Зголемувањето на отпорноста на катастрофи е само една цел.“
„Задоволувањето на потребите на оние во ранливи ситуации ќе биде приоритет“, вети тој.
„Земјотресите погодија 1,7 милиони сириски бегалци и мигранти што живеат во нашите 11 области. Тие, исто така, ќе имаат корист од овие напори на инклузивен начин“, нагласи тој.
Извор: www.aa.com.tr
