Премиерот Христијан Мицкоски во гостување на Канал 5 говореше за можниот модел на пристапување на земјава во Европската Унија, посочувајќи дека постои сценарио според кое Македонија, заедно со Црна Гора и Албанија, би можела да стане членка на Унијата на почетокот на 2027 година, но со ограничени права во почетната фаза.
Според него, таквиот модел би подразбирал земјата да седне „на масата“ во Брисел, да го развее македонското знаме, но без право на глас и без можност за вето.
„Да учествуваме во работата на Советот, во комисиите и во другите тела, но без право на глас“, изјави Мицкоски, додавајќи дека во оваа фаза земјата не би имала ниту свој еврокомесар.
Премиерот појасни дека станува збор за концепт на постепена, односно „gradual integration“, при што државата би ги затворала поглавјата едно по едно, а со секое затворено поглавје би следела подлабока интеграција во структурите на Унијата.
Како задолжителни услови за ваквиот процес ги наведе усогласувањето со заедничката надворешна и безбедносна политика на ЕУ и владеењето на правото.
„Ние сме усогласени со заедничката надворешна и безбедносна политика“, истакна Мицкоски, додавајќи дека и претходната влада имала усогласување, но дека актуелната влада е таа што ќе ги преземе конкретните чекори и ќе ги потпише договорите.
Во однос на уставните измени, премиерот посочи дека тие се дел од поширокиот пакет обврски што произлегуваат од претходно преземените ангажмани на државата, нагласувајќи дека станува збор за процес кој веќе бил прифатен од претходната влада.
Извор: zurnal.mk
