Градоначалникот на Прилеп, Дејан Проданоски, на настан посветен на првите 100 дена од мандатот направи отчет за сработеното, нагласувајќи дека периодот бил исполнет со интензивна работа, храбри одлуки и конкретни резултати.
„100 дена можеби изгледаат кратко, но кога секој од нив е исполнет со посветена работа и поставување темели за идниот развој, нивното значење е големо“, истакна Проданоски, додавајќи дека функцијата градоначалник ја доживува како обврска, одговорност и чест.
Во изминатиот период, како што посочи, биле донесени одлуки за стабилен финансиски развој и започнати инфраструктурни зафати кои веќе го менуваат изгледот на градот. Меѓу реализираните и тековните проекти ги издвои:
изградба на кружен тек кај мостот Табана,
реконструкција на тротоарот и поставување ново осветлување на улицата „Кеј 1 Мај“,
реконструкција на спортските игралишта во населбата Точила,
Проданоски потенцираше дека локалната самоуправа вложува во повеќе области – образование, спорт, култура, животна средина и социјална поддршка, со цел одржлив и комплексен развој.
Во делот на екологијата беа организирани еко-акции и чистење на градската река од талог, а во културниот сегмент беше реализирана „Прилепската празнична приказна“.
Градоначалникот упати благодарност до општинската администрација, јавните претпријатија, Владата и граѓаните за поддршката, нагласувајќи дека довербата е двигател за понатамошната работа.
„Продолжуваме со истата енергија, со фокус на младите, семејствата, инфраструктурата, културата и чистата животна средина. Сто дена се само почеток“, порача Проданоски.
Според него, поставените темели треба да овозможат долгорочна трансформација на Прилеп во модерен, зелен и економски развиен град.
Извор: zurnal.mk
