Американските воздухопловни сили воведуваат нова палета на бои за својата флота за воздушен транспорт, а ова важи и за авионите од следната генерација „Ер Форс Уан“, кои ќе бидат украсени со црвена, бела и темно сина, како и златна боја, објави службата.
Новиот дизајн ќе означи отстапување од сегашната бела и двобојна сина боја што датира од администрацијата на претседателот Џон Ф. Кенеди. Претходен предлог на Доналд Трамп – црвено-бело-сина варијанта, која беше отфрлена во 2022 година откако воздухопловните сили утврдија дека потемните бои можат да предизвикаат проблеми со прегревање – ќе биде обновен.
Трамп го прифати авионот како подарок од Катар
Редизајнот ќе биде применет на VC-25B – воената ознака за авионот „Боинг 747-8i“ што ќе служи како „Ер Форс Уан“. Програмата „Ер Форс Уан“ вклучува конверзија на два авиони 747-8 во специјализирани млазни авиони опремени со напредни комуникациски и одбранбени системи што ќе служат како следната генерација воздушен транспорт за претседателот на САД. Работите доцнат четири години, а испораката се очекува во 2028 година.
Во меѓувреме, во 2025 година, претседателот Трамп прифати подарок од државата Катар – луксузен патнички авион Боинг 747. Белата куќа побара од воздухопловните сили што е можно поскоро да го конвертираат за употреба како претседателски Air Force One.
Уште четири модифицирани авиони Боинг 757-200, кои се користат за превоз на потпретседателот, членовите на кабинетот, членовите на Конгресот и други високи владини функционери, ќе бидат украсени со нови бои, објавија воздухопловните сили, но не беа откриени детали за тоа како новиот дизајн ќе ги реши термичките проблеми, поради што претходниот предлог на Трамп за палетата на бои беше отфрлен. Тој беше отфрлен од администрацијата на Бајден откако беше утврдено дека ќе се направат дополнителни трошоци.
Опседнат со златната боја
Кога Доналд Трамп се врати на функцијата во јануари, Белата куќа претрпе еден вид трансформација. Неговата Овална соба е реновирана и има многу позлатени детали, а тоа предизвика многу реакции од јавноста.
Мебел, рамки за слики, декорации и бројни други додатоци го красат секој агол од Овалната соба од јануари минатата година, а Трамп наводно има слична визија за новата сала за бал од 200 милиони долари. Бранејќи го својот избор на декор, претседателот рече: „Нема ништо како злато и нема ништо како чисто злато“.
Наскоро сподели слики од Овалната соба и златните детали со коментар: „Странските лидери и сите други ‘полудат’ кога ќе го видат квалитетот и убавината. Најдобрата Овална соба досега, во однос на успехот и изгледот!!!“
Извор: vecer.mk
